Author Description

"Ang Bio(Lente) ay isang kolektibong pagninilay ng mga manunulat sa danas sa karahasan ng mga kontemporaneong henerasyon sa iba't ibang bahagi ng bansa. Hindi lámang ito literal na dahas kundi epistemikong karahasan na nagpapamangmang at nagpapatanggap sa dinarahas sa kaibahan nito na mababa, hindi buo't mabubuo, hindi mahalaga. Nagninilay ang mga katha sa mga naging at nagiging historikal na serialidad ng pambansang trauma sa pananakop, batas militar, diktadura, tiraniya, populistang pangulo, at iba pa. Patuloy na nakadungaw kundi man namamayagpag ang ulo ng fasismo at tiraniya lalo na sa mga populistang pangulo. Ang pinakainaapi rito ang siya pang nagiging balon ng botong nagtitiyak ng kasunod. Patuloy na lumalawak at lumalalim ang danas sa karahasan at kultura ng impunidad, kumikitid ang demokrasya at ehersisyo ng mga karapatan, umiigting ang biopolitikal na dominasyon ng ating mga katawan at espasyo. Kung hindi mapipigilan ang sistemikong danas sa karahasan, napipinto tayo sa ikatlong populistang pangulo sa 2028, 2034, 2040... Sa kanila na lang ang Pilipinas? Ang Bio(Lente) ay mga akda na direktang humaharap, nakikipagtunggali, nakikibaka sa mga danas ng literal at epistemikong karahasan kahapon, ngayon, at búkas. Kung may wish ang librong ito, ito ay makapag-ambag ng mga napapanahon at makabuluhang akda na makapagpapamulat sa mga kasalukuyang henerasyon para hindi lumimot, hindi idambana ang fake news, magtanong, bumoto hindi para sa mananalong sugal kundi para sa komon at kolektibong mga adhikain ng at para sa bayan. Makapag-ambag para matuldukan ang serialidad na sila-sila na lang sa 2028, 2034, at lampas-lampasan pa rito. Sa sambayanan ang Pilipinas!"--back cover.