Au Roy Ne vous pouvant donner ces ouvrages antiques Pour vostre Sainct-Germain, ou pour Fontainebleau, Je les vous donne (Sire) en ce petit tableau Peint, le mieux que j'ay peu, de couleurs poetiques. Qui mis sous vostre nom devant les yeux publiques, Si vous le daignez voir en son jour le plus beau, Se pourra bien vanter d'avoir hors du tumbeau Tire des vieux Romains les poudreuses reliques. Que vous puissent les Dieux un jour donner tant d'heur, De rebastir en France une telle grandeur Que je la voudrois bien peindre en vostre langage: Et peult estre, qu'a lors vostre grand'Majeste Repensant a mes vers, diroit qu'ilz ont este De vostre Monarchie un bienheureux presage. I Divins Esprits, dont la poudreuse cendre, Gist sous le faix de tant de murs couverts, Non vostre loz, qui vif par voz beaux vers Ne se verra sous la terre descendre, Si des humains la voix se peult estendre Depuis icy jusqu'au fond des enfers, Soient a mon cry les abysmes ouvers, Tant que d'abas vous me puissiez entendre.