Author Description

O demo á orella está constituído por dezaoito relatos breves que atravesan diferentes épocas da historia, dende a idade remota na que o ser humano comezaba a distinguirse na súa loita pola supervivencia, os dous primeiros contos: " Sombras na caverna " , " Flor-na-neve-azul " ; pasando polos séculos de esplendor do Imperio Romano, " Lonxinio ou a saudade " , " Ama Pitila " ; ou a Galicia das revoltas irmandiñas, para achegarse máis o mundo contemporáneo co último relato, " Boa vontade " , que semella ter certa relación coa vida do pirata pontevedrés Benito Soto. Nestas rápidas biografías ficcionadas, ó amparo de acontecementos históricos recoñecibles, móstrasenos a existencia dos seres humanos como unha condena a penas invariable ó longo do tempo, e da que o sentimento relixioso non consegue redimilos.