Author Description

Yah laghu upanyas amaanaviya hoti sabhyata ke viruddh aadivasiyon ke pakchh men naisargik jeevan shaili jeene ko utprerit karta ek sashakt daleel aur prastavna hai. Nadiyon, jangalon aur pahadon samet poore paryavaran ko nirankush vikaas ke khataron se bachaye rakhne ki ek jid aur sanak, kroor hoti tamaam satta-sanrachnaon ke prati mukhar-maun inqalab ki tarah. Yah sampurn srishti ke saath manushya ke tootate rishte aur aapasdariyon ko bacha lene ki ek chunautipurn jaddojahad bhi hai. Is asamapt sangharsh men saans lete aham kirdaaron ki yuyutsaa, tanaav, saghan santaap aur utkat prem ki marmaantak kathaa hai yah. Udaatt maksadon ko haasil karne ke liye vyaktigat hiton ko saamuhik hiton ke haashiye par lahuluhaan chhod dene ka kathin hausala aur sankalp bhi hai. Beraham aur bejaar ho chale vyaktigat aur samaajik rishton ke viruddh ek maanaviya aur bhaavatmak hatakshep hai yah. Prakriti ke jeevant saahcharya men yuva kirdaron ke saamne khulta jaadui yathaarth se sarshaar ek aashcharya-lok hai jahaan jeevan men pahli baar bahut kuchh adbhut aur 'ahaa!' ghatit hone ka anirvachaniya sukh aur kautuk bhi hai.