Author Description

Buugga "Dhaqaalihii Jamhuuriyadda Soomaaliyeed: 1960-1991" waxa uu si qoto dheer u falanqaynayaa, lafagurayaa, oo u soo gudbinayaa dhaqaalihii Soomaaliya ee 60-kii ilaa 91-kii. Qaybo ka mid ah buugga ayaa hore loo daabacay iyaga oo ah warqado cilmi ah, buugguna waxa uu ka dhashay cilmibaadhis loo maray hab cilmi ah, taas oo xogta uu xambaarsan yahay ka dhigaysa mid miisaaman oo raadraac sugan leh.Buuggu waxa uu is dul taagayaa dhaqaalihii gudaha ee Soomaaliya, sida waxsoosaarkii, warshadihii, siyaasadihii, iyo nidaamyadii dhaqaale ee hantiwadaaggu tusaalaha u yahay, iyo dhaqaalihii dibedda, sida xidhiidhkii dhaqaale ee dalku la lahaa dunida inteeda kale, daymihii iyo gargaarkii shisheeye ee Soomaaliya dibedda ka heli jirtay. Maadaama oo 1991-kii ka dib aanay Soomaalidu arag dawlad taabbagal ah, waxa aad u badan dadka hibanaya qarankii burburay isaga oo 30 jir ah iyo wixii la dumay. Waxa soo noqnoqota daltabyo loo qabo qarankii burburay ama xilliga dadka badhkii ugu yeedhaan "Berisamaad".